ആദ്യപ്രതിഷ്ഠ ഭൂമിയിൽ അന്തർധാനം ചെയ്തു.
നവയോഗികളിൽ രണ്ടാമനും ഇതുപോലൊരു സാളഗ്രാമം ലഭിച്ചു. അദ്ദേഹവും പ്രതിഷ്ഠയ്ക്ക് കണ്ടെത്തിയ ഭൂമി തിരുനാവായയായിരുന്നു.
എന്നാൽ ആ സാളഗ്രാമവും പ്രതിഷ്ഠാശേഷം ഭൂമിയ്ക്കടിയിൽ മറഞ്ഞു. ഇപ്രകാരം എട്ടുപേരുടെ പ്രതിഷ്ഠയും ഭൂമിയ്ക്കടിയിലേയ്ക്ക് അപ്രത്യക്ഷമായി. എട്ട് വിഗ്രഹങ്ങളും ഭൂമിയിൽ അന്തർധാനം ചെയ്തപ്പോൾ ഇളയവനായ കരഭാജനൻ അതിൻ്റെ കാരണത്തെപ്പറ്റി ചിന്തിച്ചു.
മഹാവിഷ്ണുവിൻ്റെ ഏത് ഭാവമാണ് പ്രതിഷ്ഠ എന്ന് തീരുമാനിയ്ക്കപ്പെടാത്തതാണ് വിഗ്രഹങ്ങൾ അപ്രത്യക്ഷമാകാൻ കാരണം എന്ന് തിരിച്ചറിഞ്ഞ കരഭാജനൻ, ‘ഇത് മുക്തിദായകനായ മുകുന്ദനാണ്’ എന്ന് കണ്ടെത്തി, അപ്രകാരം തീരുമാനിച്ച് പ്രതിഷ്ഠ നടത്തി.
ഭാരതപ്പുഴയിലെ വെള്ളംകൊണ്ടാണ് ധാര വേണ്ടതെന്നും താമരപ്പൂവാണ് സമർപ്പണപുഷ്പമെന്നും ദീപം നെയ്‌വിളക്കായിരിയ്ക്കണം എന്നും നേദ്യം പാൽപ്പായസമാണ് എന്നും തീരുമാനിച്ചപ്പോൾ പ്രതിഷ്ഠ ഉറച്ചു.

ജമദഗ്നി മഹർഷിയ്ക്കുള്ള ശ്രാദ്ധക്രിയകൾ പരശുരാമൻ ഇവിടെ ചെയ്തതായി വിശ്വസിയ്ക്കുന്നു.
മുക്തിപ്രദായകനായ മുകുന്ദൻ്റെ മുന്നിൽ, ദക്ഷിണഗംഗയെന്നറിയപ്പെടുന്ന ഭാരതപ്പുഴയുടെ തീരത്ത്, അന്നുമിന്നും അനേകർ പിതൃക്കൾക്ക് മോക്ഷം നൽകാനായി ബലിക്രിയകൾക്കായി നിത്യം എത്തിക്കൊണ്ടിരിയ്ക്കുന്നു.
ഗജേന്ദ്രമോഷം കഥ തിരുനാവായ ക്ഷേത്രവുമായി ബന്ധപ്പെട്ടതാണ്.
ഈ ഗജേന്ദ്രനെയാണ് ഇവിടെ ഗണപതിയായി പ്രതിഷ്ഠിച്ചിരിയ്ക്കുന്നത്.
മഹാലക്ഷ്മി പ്രധാനപ്രതിഷ്ഠയായി വരുന്ന അത്യപൂർവ്വ ക്ഷേത്രവുമാണ് തിരുനാവായ.

ഭാരതപ്പുഴയുടെ വടക്കേക്കരയിലായി തിരുനാവാമുകുന്ദൻ്റെ ക്ഷേത്രം സ്ഥിതിചെയ്യുന്നു. തെക്കേക്കരയിലാണ് ബൃഹസ്പതി പ്രതിഷ്ഠിച്ച ബ്രഹ്മാവിൻ്റെ ക്ഷേത്രം. കുറച്ചുമാറി ഇതേ കരയിൽത്തന്നെ ശിവൻ്റെ ക്ഷേത്രവുമുണ്ട്.
ഈ മൂന്നുക്ഷേത്രങ്ങൾ അദൃശ്യമായൊരു ശ്രീചക്രത്തിലെ ത്രികോണത്തിൻ്റെ മൂന്ന് മൂലകളിലായാണ് സ്ഥിതിചെയ്യുന്നത്.
മദ്ധ്യബിന്ദുവിൽ രാജരാജേശ്വരി വിരാജിയ്ക്കുന്നു. രാജരാജേശ്വരിയുടെ സ്ഥാനം ഭാരതപ്പുഴയുടെയും ഈ ത്രികോണത്തിൻ്റെയും നടുവിലായിട്ടാണ്.
ഇപ്രകാരം അപൂർവ്വപ്രതിഷ്ഠകൾ നടത്തിയ ഒരു ഭൂമിയാണ് തിരുനാവായ – തവനൂർ ഭാഗങ്ങൾ.
ബ്രഹ്മാവ് നടത്തിയ യാഗത്തിൽ സമസ്തദേവതകളും വന്നുചേർന്ന ഭൂമി.
മാഘമാസത്തിൽ ഈ പ്രകൃതിയുടെ താളം മാറുകയാണ്.
പ്രചണ്ഡമായ ദേവതാപ്രഭാവം വന്നുനിറയുന്ന കാലം.
ഈ ദിവസങ്ങളിലെ പുണ്യനിളാസ്നാനവും പൂജാദികാര്യങ്ങളിൽ പങ്കെടുക്കുന്നതും വ്യക്തികൾക്കും ദേശങ്ങൾക്കും സമാജത്തിനും ഏറെ ശ്രേയസ്ക്കരമാണ്.